অধ্যাত্ম রামাযণ ২ – অযোধ্যাকাণ্ডম্

.. অধ্যাত্মরামযণে অযোধ্যাকাণ্ডম্ ..

       .. অযোধ্যা কাণ্ডঃ ..
       .. প্রথমঃ সর্গঃ ..
একদা সুখমাসীনং রামম্ স্বান্তঃপুরাজিরে .
সর্বাভরণসংপন্নং রত্নসিংহাসনে স্থিতম্ .. ১..
নীলোত্পলদলশ্যামং কৌস্তুভামুক্তকন্ধরম্ .
সীতযা রথদণ্ডেন চামরেণাথ বীজিতম্ .. ২..
বিনোদযন্তং তাম্বূলচর্বণাদিভিরাদরাত্ .
নারদোঽবতরদ্দ্রষ্টুমম্বরাদ্যত্র রাঘবঃ .. ৩..
শুদ্ধস্ফটিকসঙ্কাশঃ শরচ্চন্দ্র ইবামলঃ .
অতর্কিতমুপাযাতো নারদো দিব্যদর্শনঃ .. ৪..
তং দৃষ্ট্বা সহসোত্থায রামঃ প্রীত্যা কৃতাঞ্জলিঃ .
ননাম শিরসা ভূমৌ সীতযা সহ ভক্তিমান্ .. ৫..
উবাচ নারদং রামঃ প্রীত্যা পরমযা যুতঃ .
সংসারিণাং মুনিশ্রেষ্ঠ দুর্লভং তব দর্শনম্ .
অস্মাকং বিষযাসক্তচেতসাং নিতরাং মুনেঃ .. ৬..
অবাপ্তং মে পূর্বজন্মকৃতপুণ্যমহোদযৈঃ .
সংসারিণাপি হি মুনে লভ্যতে সত্সমাগমঃ .. ৭..
অতস্ত্বদ্দর্শনাদেব কৃতার্থোঽস্মি মুনীশ্বর .
কিং কার্যং তে মযা কার্যং ব্রূহি তত্করবাণি ভোঃ .. ৮..
অথ তং নারদোঽপ্যাহ রাঘবং ভক্তবত্সলম্ .
কিং মোহযসি মাং রাম বাক্যৈর্লোকানুসারিভিঃ .. ৯..
সংসার্যহমিতি প্রোক্তং সত্যমেতত্ত্বযা বিভোঃ .
জগতামাদিভূতা যা সা মাযা গৃহিণী তব .. ১০..
ত্বত্সন্নিকর্ষাজ্জাযন্তে তস্যাং ব্রহ্মাদযঃ প্রজাঃ .
ত্বদাশ্রযা সদা ভাতি মাযা যা ক্রিগুণাত্মিকা .. ১১..
সূতেঽজস্রং শুক্লকৃষ্ণলোহিতাঃ সর্বদা প্রজাঃ .
লোকত্রযমহাগেহে গৃহস্থস্ত্বমুদাহৃতঃ .. ১২..
ত্বং বিষ্ণুর্জানকী লক্ষ্মীঃ শিবস্ত্বং জানকী শিবা .
ব্রহ্মা ত্বং জানকী বাণী সূর্যস্ত্বং জানকী প্রভা .. ১৩..
ভবান্ শশাঙ্কঃ সীতা তু রোহিণী শুভলক্ষণা .
শক্রস্ত্বমেব পৌলোমী সীতা স্বাহানলো ভবান্ .. ১৪..
যমস্ত্বং কালরূপশ্চ সীতা সংযমিনী প্রভো .
নিরৃতিস্ত্বং জগন্নাথ তামসী জানকী শুভা .. ১৫..
রাম ত্বমেব বরুণো ভার্গবী জানকী শুভা .
বাযুস্ত্বং রাম সীতা তু সদাগতিরিতীরিতা .. ১৬..
কুবেরস্ত্বং রাম সীতা সর্বসংপত্প্রকীর্তিতা .
রুদ্রাণী জানকী প্রোক্তা রুদ্রস্ত্বং লোকনাশকৃত্ .. ১৭..
লোকে স্ত্রীবাচকং যাবত্তত্সর্বং জানকী শুভা .
পুন্নামবাচকং যাবত্তত্সর্বং ত্বং হি রাঘব .. ১৮..
তস্মাল্লোকত্রযে দেব যুবাভ্যাং নাস্তি কিঞ্চন .. ১৯..
ত্বদাভাসোদিতাজ্ঞানমব্যাকৃতমিতীর্যতে .
তস্মান্মহাংস্ততঃ সূত্রং লিঙ্গং সর্বাত্মকং ততঃ .. ২০..
অহঙ্কারশ্চ বুদ্ধিশ্চ পঞ্চপ্রাণেন্দ্রিযাণি চ .
লিঙ্গমিত্যুচ্যতে প্রাজ্ঞৈর্জন্মমৃত্যুসুখাদিমত্ .. ২১..
স এব জীবসংজ্ঞশ্চ লোকে ভাতি জগন্মযঃ .
অবাচ্যানাদ্যবিদ্যৈব কারণোপাধিরুচ্যতে .. ২২..
স্থূলং সূক্ষ্মং কারণাখ্যমুপাধিত্রিতযং চিতেঃ .
এতৈর্বিশিষ্টো জীবঃ স্যাদ্বিযুক্তঃ পরমেশ্বরঃ .. ২৩..
জাগ্রত্স্বপ্নসুষুপ্তাখ্যা সংসৃতির্যা প্রবর্ততে .
তস্যা বিলক্ষণঃ সাক্ষী চিন্মাত্রস্ত্বং রঘূত্তম .. ২৪..
ত্বত্ত এব জগজ্জাতং ত্বযি সর্বং প্রতিষ্ঠিতম্ .
ত্বয্যেব লীযতে কৃত্স্নং তস্মাত্ত্বং সর্বকারণম্ .. ২৫..
রজ্জাবহিমিবাত্মানং জীবং জ্ঞাত্বা ভযং ভবেত্ .
পরাত্মাহমিতি জ্ঞাত্বা ভযদুঃখৈর্বিমুচ্যতে .. ২৬..
চিন্মাত্রজ্যোতিষা সর্বাঃ সর্বদেহেষু বুদ্ধযঃ .
ত্বযা যস্মাত্প্রকাশ্যন্তে সর্বস্যাত্মা ততো ভবান্ .. ২৭..
অজ্ঞানান্ন্যস্যতে সর্বং ত্বযি রজ্জো ভুজঙ্গবত্ .
ত্বজ্জ্ঞানাল্লীযতে সর্বং তস্মাজ্জ্ঞানং সদাভ্যসেত্ .. ২৮..
ত্বত্পাদভক্তিযুক্তানাং বিজ্ঞানং ভবতি ক্রমাত্ .
তস্মাত্ত্বদ্ভক্তিযুক্তা যে মুক্তিভাজস্ত এব হি .. ২৯..
অহং ত্বদ্ভক্তভক্তানাং তদ্ভক্তানাং চ কিঙ্করঃ .
অতো মামৌগৃহ্ণীষ্ব মোহযস্ব ন মাং প্রভো .. ৩০..
ত্বন্নাভিকমলোত্পন্নো ব্রহ্মা মে জনকঃ প্রভো .
অতস্তবাহং পৌত্রোঽস্মি ভক্তং মাং পাহি রাঘব .. ৩১..
ইত্যুক্ত্বা বহুশো নত্বা স্বানন্দাশ্রু পরিপ্লুতঃ .
উবাচ বচনং রাম ব্রহ্মণা নোদিতোঽস্ম্যহম্ .. ৩২..
রাবণস্য বধার্থায জাতোঽসিরঘুসত্তম .
ইদানীং রাজ্যরক্ষার্থং পিতা ত্বাম্ভিষেক্ষ্যতি .. ৩৩..
যদি রাজ্যাভিসংসক্তো রাবণং ন হনিষ্যসি .
প্রতিজ্ঞা তে কৃতা রাম ভূভারহরণায বৈ .. ৩৪..
তত্সত্যং কুরু রাজেন্দ্র সত্যসংধস্ত্বমেব হি .
শ্রুত্বৈতদ্গদিতং রামো নারদং প্রাহ সস্মিতম্ .. ৩৫..
শৃণু নারদ মে কিঞ্চিদ্বিদ্যতেঽবিদিতং ক্বচিত্ .
প্রতিজ্ঞাতং চ যত্পূর্বং করিষ্যে তন্ন সংশযঃ .. ৩৬..
কিন্তু কালানুরোধেন তত্তত্প্রারব্ধসংক্ষযাত্ .
হরিষ্যে সর্বভূভারং ক্রমেণাসুরমণ্ডলম্ .. ৩৭..
রাবণস্য বিনাশার্থং শ্বো গন্তা দণ্ডকাননম্ .
চতুর্দশ সমাস্তত্র হ্যুষিত্বা মুনিবেষধৃক্ .. ৩৮..
সীতামিষেণ তং দুষ্টং সকুলং নাশযাম্যহম্ .
এবং রামে প্রতিজ্ঞাতে নারদঃ প্রমুমোদ হ .. ৩৯..
প্রদক্ষিণত্রযং কৃবা দণ্ডবত্প্রণিপত্য তম্ .
অনুজ্ঞাতশ্চ রামেণ যযৌ দেবগতিং মুনিঃ .. ৪০..
সংবাদং পঠতি শৃণোতি সংস্মরেদ্বা যো নিত্যং
     মিনিবররামযোঃ সভক্ত্যা .
সংপ্রাপ্নোত্যমরসুদুর্লভং বিমোক্ষং কৈবল্যং
     বিরতিপুরঃসরং ক্রমেণ .. ৪১..
ইতি শ্রীমদধ্যাত্মরামযণে উমামহেশ্বরসংবাদে
   অযোধ্যাকাণ্ডে প্রথমঃ সর্গঃ .. ১..