বিষ্ণুভুজঙ্গপ্রযাতস্তোত্রম্

.. শ্রীবিষ্ণুভুজঙ্গপ্রযাতস্তোত্রম্ ..

চিদংশং বিভুং নির্মলং নির্বিকল্পং
     নিরীহং নিরাকারমোঙ্কারগম্যম্ .
গুণাতীতমব্যক্তমেকং তুরীযং
     পরং ব্রহ্ম যং বেদ তস্মৈ নমস্তে .. ১..
বিশুদ্ধং শিবং শান্তমাদ্যন্তশূন্যং
     জগজ্জীবনং জ্যোতিরানন্দরূপম্ .
অদিগ্দেশকালব্যবচ্ছেদনীযং
     ত্রযী বক্তি যং বেদ তস্মৈ নমস্তে .. ২..
মহাযোগপীঠে পরিভ্রাজমানে
     ধরণ্যাদিতত্ত্বাত্মকে শক্তিযুক্তে .
গুণাহস্করে বহ্নিবিম্বার্ধমধ্যে
     সমাসীনমোঙ্কর্ণিকেঽষ্টাক্ষরাব্জে .. ৩..
সমানোদিতানেকসূর্যেন্দুলোটি-
     প্রভাপূরতুল্যদ্যুতিং দুর্নিরীক্ষম্ .
ন শীতং ন চোষ্ণং সুবর্ণাবদাত-
     প্রসন্নং সদানন্দসংবিত্স্বরূপম্ .. ৪..
সুনাসাপুটং সুন্দরভ্রূললাটং
     কিরীটোচিতাকুঞ্চিতস্নিগ্ধকেশম্ .
স্ফুরত্পুণ্ডরীকাভিরামাযতাক্ষং
     সমুত্ফুল্লরত্নপ্রসূনাবতংসম্ .. ৫..
লসত্কুণ্ডলামৃষ্টগণ্ডস্থলান্তং
     জপারাগচোরাধরং চারুহাসম্ .
অলিব্যাকুলামোলিমন্দারমালং
     মহোরস্ফুরত্কৌস্তুভোদারহারম্ .. ৬..
সুরত্নাঙ্গদৈরন্বিতং বাহুদণ্ডৈ-
     শ্চতুর্ভিশ্চলত্কঙ্কণালংকৃতাগ্রৈঃ .
উদারোদরালংকৃতং পীতবস্ত্রং
     পদদ্বন্দ্বনির্ধূতপদ্মাভিরামম্ .. ৭..
স্বভক্তেষু সন্দর্শিতাকারমেবং
     সদা ভাবযন্সংনিরুদ্ধেন্দ্রিযাশ্বঃ .
দুরাপং নরো যাতি সংসারপারং
     পরস্মৈ পরেভ্যোঽপি তস্মৈ নমস্তে .. ৮..
শ্রিযা শাতকুম্ভদ্যুতিস্নিগ্ধকান্ত্যা
     ধরণ্যা চ দূর্বাদলশ্যামলাঙ্গ্যা .
কলত্রদ্বযেনামুনা তোষিতায
     ত্রিলোকীগৃহস্থায বিষ্ণো নমস্তে .. ৯..
শরীরং কলত্রং সুতং বন্ধুবর্গং
     বযস্যং ধনং সদ্ম ভৃত্যং ভুবং চ .
সমস্তং পরিত্যজ্য হা কষ্টমেকো
     গমিষ্যামি দুঃখেন দূরং কিলাহম্ .. ১০..
জরেযং পিশাচীব হা জীবতো মে
     বসামক্তি রক্তং চ মাংসং বলং চ .
অহো দেব সীদামি দীনানুকম্পি-
     ন্কিমদ্যাপি হন্ত ত্বযোদাসিতব্যম্ .. ১১..
কফব্যাহতোষ্ণোল্বণশ্বাসবেগ-
     ব্যথাবিস্ফুরত্সর্বমর্মাস্থিবন্ধাম্ .
বিচিন্ত্যাহমন্ত্যামসংখ্যামবস্থাং
     বিভেমি প্রভো কিং করোমি প্রসীদ .. ১২..
লপন্নচ্যুতানন্ত গোবিন্দ বিষ্ণো
     মুরারে হরে নাথ নারাযণেতি .
যথানুস্মরিষ্যামি ভক্ত্যা ভবন্তং
     তথা মে দযাশীল দেব প্রসীদ .. ১৩..
ভুজঙ্গপ্রযাতং পঠেদ্যস্তু ভক্ত্যা
     সমাধায চিত্তে ভবন্তং মুরারে .
স মোহং বিহাযাশু যুষ্মত্প্রসাদা-
     ত্সমাশ্রিত্য যোগং ব্রজত্যচ্যুতং ত্বাম্ .. ১৪..
ইতি শ্রীমত্পরমহংসপরিব্রাজকাচার্যস্য
শ্রীগোবিন্দভগবত্পূজ্যপাদশিষ্যস্য
শ্রীমচ্ছঙ্করভগবতঃ কৃতৌ
শ্রীবিষ্ণুভুজঙ্গপ্রযাতস্তোত্রং সংপূর্ণম্ ..