বালকৃতং কৃষ্ণস্তোত্রম্

.. বালকৃতং কৃষ্ণস্তোত্রম্ ..

বালা ঊচুঃ
যথা সুরক্ষিত ব্রহ্মন্ সর্বাপত্স্বেব নঃ কুলম্ |
তথা রক্ষাং কুরু পুনর্দাবাগ্নের্মধুসূদন || ১||
ত্বমিষ্টদেবতাঽস্মাকং ত্বমেব কুলদেবতা |
স্রষ্টা পাতা চ সংহর্তা জগতাং চ জগত্পতে || ২||
বহ্নির্বা বরূণো বাঽপি চন্দ্রো বা সূর্য এব চ |
নমঃ কুবেরঃ পবন ঈশানাদ্যাশ্চ দেবতা || ৩||
ব্রহ্মেশ- শেষ- ধর্মেন্দ্রা মুনীন্দ্রা মনবঃ স্মৃতাঃ |
মানবাশ্চ তথা দৈত্যা যক্ষ- রাক্ষস- কিন্নরাঃ || ৪||
যে যে চরাঽচরাশ্চৈব সর্বে তব বিভূতযঃ |
আবির্ভাবস্তিরোভাবঃ সর্বেষাং চ তবেচ্ছযা || ৫||
অভযং দেহি গোবিংদ বহ্নিসংহরণং কুরু |
বযং ত্বাং শরণং যামো রক্ষ নঃ শরণাগতান্ || ৬||
ইত্যেবমুক্ত্বা তে সর্বে তস্থুর্ধ্যাত্বা পদাম্বুজম্ |
দূরীভূতস্তু দাবাগ্নিঃ শ্রীকৃষ্ণামৃতদৃষ্টিতঃ || ৭||
দূরীভূতে চ দাবাগ্নৌ ননৃতুস্তে মুদান্বিতাঃ |
সর্বাপদঃ প্রণশ্যন্তি হরিস্মরণমাত্রতঃ || ৮||
ইদং স্তোত্রং মহাপুণ্যং প্রাতরূত্থায যঃ পঠেত্ |
বহ্নিতো ন ভবেত্তস্য ভযং জন্মনি জন্মনি || ৯||
শত্রুগ্রস্তে চ দাবাগ্নৌ বিপত্তৌ প্রাণসংকটে |
স্তোত্রমেতত্ পঠিত্বা তু মুচ্যতে নাঽত্র সংশযঃ || ১০||
|| ইতি শ্রীব্রহ্মবৈবর্তে বালকৃতং কৃষ্ণস্তোত্রং সম্পূর্ণম্ ||