মীনাক্ষী পঞ্চরত্নম্

.. মীনাক্ষী পঞ্চরত্নম্ ..

                    .. শ্রীঃ ..

          .. মীনাক্ষী পঞ্চরত্নম্ ..

উদ্যদ্ভানু সহস্রকোটিসদৃশাং কেযূরহারোজ্জ্বলাং
বিম্বোষ্ঠীং স্মিতদন্তপংক্তিরুচিরাং পীতাম্বরালংকৃতাম্ .
বিষ্ণুব্রহ্মসুরেন্দ্রসেবিতপদাং তত্বস্বরূপাং শিবাং
মীনাক্ষীং প্রণতোঽস্মি সংততমহং কারুণ্যবারাংনিধিম্ .. ১..

মুক্তাহারলসত্কিরীটরুচিরাং পূর্ণেন্দুবক্ত্র প্রভাং
শিঞ্জন্নূপুরকিংকিণিমণিধরাং পদ্মপ্রভাভাসুরাম্ .
সর্বাভীষ্টফলপ্রদাং গিরিসুতাং বাণীরমাসেবিতাং
মীনাক্ষীং প্রণতোঽস্মি সংততমহং কারুণ্যবারাংনিধিম্ .. ২..

শ্রীবিদ্যাং শিববামভাগনিলযাং হ্রীংকারমন্ত্রোজ্জ্বলাং
শ্রীচক্রাঙ্কিত বিন্দুমধ্যবসতিং শ্রীমত্সভানাযকীম্ .
শ্রীমত্ষণ্মুখবিঘ্নরাজজননীং শ্রীমজ্জগন্মোহিনীং
মীনাক্ষীং প্রণতোঽস্মি সংততমহং কারুণ্যবারাংনিধিম্ .. ৩..

শ্রীমত্সুন্দরনাযকীং ভযহরাং জ্ঞানপ্রদাং নির্মলাং
শ্যামাভাং কমলাসনার্চিতপদাং নারাযণস্যানুজাম্ .
বীণাবেণুমৃদঙ্গবাদ্যরসিকাং নানাবিধাডাম্বিকাং
মীনাক্ষীং প্রণতোঽস্মি সংততমহং কারুণ্যবারাংনিধিম্ .. ৪..

নানাযোগিমুনীন্দ্রহৃন্নিবসতীং নানার্থসিদ্ধিপ্রদাং
নানাপুষ্পবিরাজিতাংঘ্রিযুগলাং নারাযণেনার্চিতাম্ .
নাদব্রহ্মমযীং পরাত্পরতরাং নানার্থতত্বাত্মিকাং
মীনাক্ষীং প্রণতোঽস্মি সংততমহং কারুণ্যবারাংনিধিম্ .. ৫..

      ইতি শ্রীমত্পরমহংসপরিব্রাজকাচার্যস্য
      শ্রীগোবিন্দভগবত্পূজ্যপাদশিষ্যস্য
      শ্রীমচ্ছংকরভগবতঃ কৃতৌ
      মীনাক্ষী পঞ্চরত্নং সংপূর্ণম্ .