ভবানীভুজঙ্গপ্রযাতস্তোত্রম্

.. ভবানীভুজঙ্গপ্রযাতস্তোত্রম্ ..

        শ্রী গণেশায নমঃ .
ষডাধারপঙ্কেরুহান্তবিরাজত্
          সুষুম্নান্তরালেঽতিতেজোল্লসন্তীম্ .
সুধামণ্ডলং দ্রাবযন্তী পিবন্তীং
          সুধামূর্তিমীডেঽহমানন্দরূপাম্ .. ১..
জ্বলত্কোটিবালার্কভাসারুণাঙ্গীং
          সুলাবণ্যশৃঙ্গারশোভাভিরামাম্ .
মহাপদ্মকিঞ্জল্কমধ্যে বিরাজত্
          ত্রিকোণোল্লসন্তীং ভজে শ্রীভবানীম্ ..২..
কণত্কিঙ্কিণীনূপুরোদ্ভাসিরত্ন
          প্রভালীঢলাক্ষার্দ্রপাদারবিন্দাম্ .
অজেশাচ্যুতাদ্যৈঃ সুরৈঃ সেব্যমানাং
          মহাদেবি মন্মূর্ধ্নি তেক্ষাবযামি .. ৩..
সুষোণাম্বরাবদ্ধনীবীবিরাজন্
          মহারত্নকাঞ্চীকলাপং নিতম্বম্ .
স্ফুরদ্দক্ষিণাবর্তনাভিং চ তিস্রো
          বলী রম্যতে রোমরাজীং ভজেঽহম্ .. ৪..
লসদ্বৃত্তমুত্তুঙ্গমাণিক্যকুম্ভো-
          পমশ্রীস্তনদ্বন্দ্বমম্বাংবুজাক্ষীম্ .
ভজে পূর্ণদুগ্ধাভিরামং তবেদং
          মহাহারদীপ্তং সদা প্রস্নুতাস্যম্ .. ৫..
শিরীষপ্রসূনোল্লসদ্বাহুদণ্ডৈর্-
          জ্বলদ্বাণকোদণ্ডপাশাঙ্কুশৈশ্চ .
চলত্কঙ্কণোদারকেযূরভূষা
          জ্বলদ্ভিঃ স্ফুরন্তীং ভজে শ্রীভবানীম্ .. ৬..
শরত্পূর্ণচন্দ্রপ্রভাপূর্ণবিম্বা
          ধরস্মেরবক্ত্রারবিন্দশ্রিযং তে .
সুরত্নাবলীহারতাটঙ্কশোভা
          ভজে সুপ্রসন্নামহং শ্রীভবানীম্ .. ৭..
সুনাসাপুটং পদ্মপত্রাযতাক্ষং
          যজন্তঃ শ্রিযং দানদক্ষং কটাক্ষম্ .
ললাটোল্লসদ্গন্ধকস্তূরিভূষো-
          জ্জ্বলদ্ভিঃ স্ফুরন্তীং ভজে শ্রীভবানীম্ .. ৮..
চলত্কুণ্ডলাং তে ভ্রমদ্ভৃঙ্গবৃন্দাং
          ঘনস্নিগ্ধধম্মিল্লভূষোজ্জ্বলন্তীম্ .
স্ফুরন্মৌলিমাণিক্যমধ্যেন্দুরেখা
          বিলাসোল্লসদ্দিব্যমূর্ধানমীডে .. ৯..
স্ফুরত্বম্ব বিম্বস্য মে হৃত্সরোজে
          সদা বাঙ্মযং সর্বতেজোমযং চ .
ইতি শ্রীভবানীস্বরূপং তদেবং
          প্রপঞ্চাত্পরং চাতিসূক্ষ্মং প্রসন্নম্ .. ১০..
গণেষাণিমাদ্যাখিলৈঃ শক্তিবৃন্দৈঃ
          স্ফুরচ্ছ্রীমহাচক্র রাজোল্লসন্তীম্ .
পরাং রাজরাজেশ্বরীং ত্বা ভবানীং
          শিবাঙ্কোপরিস্থা৅ং শিবা৅ং ভাবযেঽহম্ .. ১১..
ত্বমর্কস্ত্বমগ্নিস্ত্বমিন্দুস্ত্বমাপ-
          স্ত্বমাকাশভূবাযবস্ত্বং চিদাত্মা .
ত্বদন্যো ন কশ্চিত্প্রকাশোঽস্তি সর্বং
          সদানন্দসংবিত্স্বরূপং তবেদম্ .. ১২..
গুরুস্ত্বং শিবস্ত্বং চ শক্তিস্ত্বমেব
          ত্বমেবাসি মাতা পিতাঽসি ত্বমেব .
ত্বমেবাসি বিদ্যা ত্বমেবাসি বুদ্ধির্-
          গতির্মে মতির্দেবি সর্বং ত্বমেব .. ১৩..
শ্রুতীনামগম্যং সুবেদাগমাদ্যৈর্-
          মহিম্নো ন জানাতি পারং তবেদম্ .
স্তুতিং কর্তুমিচ্ছামি তে ত্বং ভবানি
          ক্ষমস্বেদমম্ব প্রমুগ্ধঃ কিলাহম্ .. ১৪..
শরণ্যে বরেণ্যে সুকারুণ্যপূর্ণে
          হিরণ্যোদরাদ্যৈরগম্যেঽতিপুণ্যে .
ভবারণ্যভীতং চ মাং পাহি ভদ্রে
          নমস্তে নমস্তে নমস্তে ভবানি .. ১৫..
ইমামন্বহং শ্রীভবানীভুজঙ্গ-
          স্তুতির্যঃ পঠেচ্ছ্রোতুমিচ্ছেত তস্মৈ .
স্বকীযং পদং শাশ্বতং চৈব সারং
          শ্রিযং চাষ্টসিদ্ধীশ্চ ভবানী দদাতি .. ১৬..
ইতি শ্রীমচ্ছঙ্করাচার্যবিরচিতং
ভবানীভুজঙ্গপ্রযাতস্তোত্রং সংপূর্ণম্ ..