পার্বতীস্তোত্রম্

.. পার্বতীস্তোত্রম্ ..

বিবুধাধিপতেজিনীশকান্তে বদনাভাজিতযামিনীশকান্তে .
নবকুন্দবিরাজমানদন্তে নলিনাভং প্রণমাম্যহং পদং তে .. ১ ..
বিকচাম্বুরুহাং বিলাসচোরৈরতিশীতৈঃ প্রবহদ্দযাম্বুপূরৈঃ .
শশিশেখরচিত্তনৃত্তরঙ্গৈস্তরসালোকয দেবি মামপাঙ্গৈঃ .. ২ ..
অবনীধরনাযকস্য কন্যে কৃপণং মাং পরিপালযাতিধন্যে .
বিধিমাধববাসবাদিমান্যে দ্রুতমুন্মূলিতভক্তলোকদৈন্যে .. ৩ ..
কুচনিন্দিতশাতকুম্ভশৈলে মণিকাঞ্চীবলযোল্লসদ্দুকূলে .
পরিপালয মাং ভবানি বালে ত্রিজগদ্রক্ষণজাগরূকলীলে .. ৪ ..
স্বরুচা জিততপ্তশাতকুম্ভে কচশোভাজিতকালমেঘডম্ভে .
পরিপালয মাং ত্রসন্নিশুম্ভে মকুটোল্লাসিসুধামযূখডিম্ভে .. ৫ ..
কুসুমাযুধজীবনাক্ষিকোণে পরিতো মামব পদ্মরাগশোণে .
স্মরবৈরিবশীকৃতপ্রবীণে চরণাব্জানতসত্ক্রিযাধুরীণে .. ৬ ..
গিরিজে গগনোপমাবলগ্নে গিরিতুঙ্গস্তনগৌরবেণ ভুগ্নে .
বস মে হৃদযে তবাঙ্গলগ্নে তব সংদর্শনমোদসিন্ধুমগ্নে .. ৭ ..
সকলোপনিষত্সরোজবাটীকলহংস্যাস্তব মে কবিত্বধাটী .
কৃপযাবিরভূদিযং তু পেটী বহতু ত্বদ্গুণরম্যরত্নকোটীঃ .. ৮ ..
.. ইতি শ্রীপার্বতীস্তোত্রং সংপূর্ণম্ ..