নবরত্নমালিকা

.. নবরত্নমালিকা ..

হারনূপুরকিরীটকুণ্ডলবিভূষিতাবযবশোভিনীং
কারণেশবরমৌলিকোটিপরিকল্প্যমানপদপীঠিকাম্ .
কালকালফণিপাশবাণধনুরঙ্কুশামরুণমেখলাং
ফালভূতিলকলোচনাং মনসি ভাবযামি পরদেবতাম্ .. ১..

গন্ধসারঘনসারচারুনবনাগবল্লিরসবাসিনীং
সান্ধ্যরাগমধুরাধারাভরণসুন্দরাননশুচিস্মিতাম্ .
মন্ধরাযতবিলোচনামমলবালচন্দ্রকৃতশেখরীং
ইন্দিরারমণসোদরীং মনসি ভাবযামি পরদেবতাম্ .. ২..

স্মেরচারুমুখমণ্ডলাং বিমলগণ্ডলম্বিমণিমণ্ডলাং
হারদামপরিশোভমানকুচভারভীরুতনুমধ্যমাম্ .
বীরগর্বহরনূপুরাং বিবিধকারণেশবরপীঠিকাং
মারবৈরিসহচারিণীং মনসি ভাবযামি পরদেবতাম্ .. ৩..

ভূরিভারধরকুণ্ডলীন্দ্রমণিবদ্ধভূবলযপীঠিকাং
বারিরাশিমণিমেখলাবলযবহ্নিমণ্ডলশরীরিণীম্ .
বারিসারবহকুণ্ডলাং গগনশেখরীং চ পরমাত্মিকাং
চারুচন্দ্রবিলোচনাং মনসি ভাবযামি পরদেবতাম্ .. ৪..

কুণ্ডলত্রিবিধকোণমণ্ডলবিহারষড্দলসমুল্লস-
ত্পুণ্ডরীকমুখভেদিনীং চ প্রচণ্ডভানুভাসমুজ্জ্বলাম্ .
মণ্ডলেন্দুপরিবাহিতামৃততরঙ্গিণীমরুণরূপিণীং
মণ্ডলান্তমণিদীপিকাং মনসি ভাবযামি পরদেবতাম্ .. ৫..

বারণাননমযূরবাহমুখদাহবারণপযোধরাং
চারণাদিসুরসুন্দরীচিকুরশেকরীকৃতপদাম্বুজাম্ .
কারণাধিপতিপঞ্চকপ্রকৃতিকারণপ্রথমমাতৃকাং
বারণান্তমুখপারণাং মনসি ভাবযামি পরদেবতাম্ .. ৬..

পদ্মকান্তিপদপাণিপল্লবপযোধরাননসরোরুহাং
পদ্মরাগমণিমেখলাবলযনীবিশোভিতনিতম্বিনীম্ .
পদ্মসম্ভবসদাশিবান্তমযপঞ্চরত্নপদপীঠিকাং
পদ্মিনীং প্রণবরূপিণীং মনসি ভাবযামি পরদেবতাম্ .. ৭..

আগমপ্রণবপীঠিকামমলবর্ণমঙ্গলশরীরিণীং
আগমাবযবশোভিনীমখিলবেদসারকৃতশেখরীম্ .
মূলমন্ত্রমুখমণ্ডলাং মুদিতনাদবিন্দুনবযৌবনাং
মাতৃকাং ত্রিপুরসুন্দরীং মনসি ভাবযামি পরদেবতাম্ .. ৮..

কালিকাতিমিরকুন্তলান্তঘনভৃঙ্গমঙ্গলবিরাজিনীং
চূলিকাশিখরমালিকাবলযমাল্লিকাসুরভিসৌরভাম্ .
বালিকামধুরগণ্ডমণ্ডলমনোহরাননসরোরুহাং
কালিকামখিলনাযিকাং মনসি ভাবযামি পরদেবতাম্ .. ৯..

নিত্যমেব নিযমেন জল্পতাং
ভুক্তিমুক্তিফলদামভীষ্টদাম্ .
শংকরেণ রচিতাং সদা জপে-
ন্নামরত্ননবরত্নমালিকাম্ .. ১০..

ইতি শ্রীমত্পরমহংসপরিব্রজকাচার্যস্য
শ্রিগোবিন্দভগবত্পূজ্যপাদশিষ্যস্য
শ্রীমচ্ছংকরভগবতঃ কৃতৌ নবরত্নমালিকা সংপূর্ণা..