ত্রিপুরসুন্দরীমানসপূজাস্তোত্রম্

.. ত্রিপুরসুন্দরীমানসপূজাস্তোত্রম্ ..

শ্রীঃ
মম ন ভজনশক্তিঃ পাদযোস্তে ন ভক্তি-
       র্ন চ বিষযবিরক্তির্ধ্যানযোগে ন সক্তিঃ .
ইতি মনসি সদাহং চিন্তযন্নাদ্যশক্তে
       রুচিরবচনপুষ্পৈরর্চনং সংচিনোমি .. ১..
ব্যাপ্তং হাটকবিগ্রহৈর্জলচরৈরারূঢদেবব্রজৈঃ
       পোতৈরাকুলিতান্তরং মণিধরৈর্ভূমীধরৈর্ভূষিতম্ .
আরক্তামৃতসিন্ধুমুদ্ধুরচলদ্বিচীচযব্যাকুল-
       ব্যোমানং পরিচিন্ত্য সন্ততমহো চেতঃ কৃতার্থীভব .. ২..
তস্মিন্নুজ্জ্বলরত্নজালবিলসত্কান্তিচ্ছটাভিঃ স্ফুটং
       কুর্বাণং বিযদিন্দ্রচাপনিচযৈরাচ্ছাদিতং সর্বতঃ .
উচ্চৈঃশৃঙ্গনিষণ্ণদিব্যবনিতাবৃন্দাননপ্রোল্লস-
       দ্গীতাকর্ণননিশ্চলাখিলমৃগং দ্বীপং নমস্কুর্মহে .. ৩..
জাতীচম্পকপাটলাদিসুমনঃসৌরভ্যসম্ভাবিতং
       হ্রীঙ্কারধ্বনিকণ্ঠকোকিলকুহূপ্রোল্লাসিচূতদ্রুমম্ .
আবির্ভূতসুগন্ধিচন্দনবনং দৃষ্টিপ্রিযং নন্দনং
চঞ্চচ্চঞ্চলচঞ্চরিকচটুলং চেতশ্চিরং চিন্তয .. ৪..
পরিপতিতপরাগৈঃ পাটলক্ষোণিভাগো
       বিকসিতকুসুমোচ্চৈঃ পীতচন্দ্রার্করশ্মিঃ .
অলিশুকপিকরাজীকূজিতৈঃ শ্রোত্রহারী
       স্ফুরতু হৃদি মদীযে নূনমুদ্যানরাজঃ .. ৫..
রম্যদ্বারপুরপ্রচারতমসাং সংহারকারিপ্রভ
       স্ফূর্জত্তোরণভারহারকমহাবিস্তারহারদ্যুতে .
ক্ষোণীমণ্ডলহেমহারবিলসত্সংসারপারপ্রদ
       প্রোদ্যদ্ভক্তমনোবিহার কনকপ্রাকার তুভ্যং নমঃ .. ৬..
উদ্যত্কান্তিকলাপকল্পিতনভঃস্ফূর্জদ্বিতানপ্রভ
       সত্কৃষ্ণাগরুধূপবাসিতবিযত্কাষ্ঠান্তরে বিশ্রুতঃ .
সেবাযাতসমস্তদৈবতগণৈরাসেব্যমানোঽনিশং
       সোঽযং শ্রীমণিমণ্ডপোঽনবরতং মচ্চেতসি দ্যোততাম্ .. ৭..
ক্বাপি প্রোদ্ভটপদ্মরাগকিরণব্রাতেন সন্ধ্যাযিতং
       কুত্রাপি স্ফুটবিস্ফুরন্মরকতদ্যুত্যা তমিস্রাযিতম্ .
মধ্যালম্বিবিশালমৌক্তিকরুচা জ্যোত্স্নাযিতং কুত্রচি-
       ন্মাতঃ শ্রীমণিমন্দিরং তব সদা বন্দামহে সুন্দরম্ .. ৮..
উত্তুঙ্গালযবিস্ফুরন্মরকতপ্রোদ্যত্প্রভামণ্ডলা-
       ন্যালোক্যাঙ্কুরিতোত্সবৈর্নবতৃণাকীর্ণস্থলীশঙ্কযা .
নীতো বাজিভিরুত্পথং বত রথঃ সূতেন তিগ্মদ্যুতে-
       র্বল্গাবল্গিগতহস্তমস্তশিখরং কষ্টৈরিতঃ প্রাপ্যতে .. ৯..
মণিসদনসমুদ্যত্কান্তিধারানুরক্তে
       বিযতি চরমসন্ধ্যাশঙ্কিনো ভানুরথ্যাঃ .
শিথিলিতগতকুপ্যত্সূতহুঙ্কারনাদৈঃ
       কথমপি মণিগেহাদুচ্চকৈরুচ্চলন্তি .. ১০..
ভক্ত্যা কিং নু সমর্পিতানি বহুধা রত্নানি পাথোধিনা
       কিং বা রোহণপর্বতেন সদনং যৈর্বিশ্বকর্মাকরোত্ .
আ জ্ঞাতং গিরিজে কটাক্ষকলযা নূনং ত্বযা তোষিতে
       শম্ভৌ নৃত্যতি নাগরাজফণিনা কীর্ণা মণিশ্রেণযঃ .. ১১..
বিদূরমুক্তবাহনৈর্বিনম্রমৌলিমণ্ডলৈ-
       র্নিবদ্ধহস্তসংপুটৈঃ প্রযত্নসংযতেন্দ্রিযৈঃ .
বিরিঞ্চিবিষ্ণুশঙ্করাদিভির্মুদা তবাম্বিকে
       প্রতীক্ষ্যমাণনির্গমো বিভাতি রত্নমণ্ডপঃ .. ১২..
ধ্বনন্মৃদঙ্গকাহলঃ প্রগীতকিংনরীগণঃ
       প্রনৃত্তদিব্যকন্যকঃ প্রবৃত্তমঙ্গলক্রমঃ .
প্রকৃষ্টসেবকব্রজঃ প্রহৃষ্টভক্তমণ্ডলো
       মুদে মমাস্তু সন্ততং ত্বদীযরত্নমণ্ডপঃ .. ১৩..
প্রবেশনির্গমাকুলৈঃ স্বকৃত্যরক্তমানসৈ-
       র্বহিস্থিতামরাবলীবিধীযমানভক্তিভিঃ .
বিচিত্রবস্ত্রভূষণৈরুপেতমঙ্গনাজনৈঃ
       সদা করোতু মঙ্গলং মমেহ রত্নমণ্ডপঃ .. ১৪..
সুবর্ণরত্নভূষিতৈর্বিচিত্রবস্ত্রধারিভি-
       র্গৃহীতহেমযষ্টিভির্নিরুদ্ধসর্বদৈবতৈঃ .
অসংখ্যসুন্দরীজনৈঃ পুরস্থিতৈরধিষ্ঠিতো
       মদীযমেতু মানসং ত্বদীযতুঙ্গতোরণঃ .. ১৫..
ইন্দ্রাদীংশ্চ দিগীশ্বরান্সহপরিবারানথো সাযুধা-
       ন্যোষিদ্রূপধরান্স্বদিক্ষু নিহিতান্সংচিন্ত্য হৃত্পঙ্কজে .
শঙ্খে শ্রীবসুধারযা বসুমতীযুক্তং চ পদ্মং স্মর-
       ন্কামং নৌমি রতিপ্রিযং সহচরং প্রীত্যা বসন্তং ভজে .. ১৬..
গাযন্তীঃ কলবীণযাতিমধুরং হুঙ্কারমাতন্বতী-
       র্দ্বারাভ্যাসকৃতস্থিতীরিহ সরস্বত্যাদিকাঃ পূজযন্ .
দ্বারে নৌমি মদোন্মদং সুরগণাধীশং মদেনোন্মদাং
       মাতঙ্গীমসিতাম্বরাং পরিলসন্মুক্তাবিভূষাং ভজে .. ১৭..
কস্তূরিকাশ্যামলকোমলাঙ্গীং
       কাদম্বরীপানমদালসাঙ্গীম্ .
বামস্তনালিঙ্গিতরত্নবীণাং
       মাতঙ্গকন্যাং মনসা স্মরামি .. ১৮..
বিকীর্ণচিকুরোত্করে বিগলিতাম্বরাডম্বরে
       মদাকুলিতলোচনে বিমলভূষণোদ্ভাসিনি .
তিরস্করিণি তাবকং চরণপঙ্কজং চিন্তয-
       ন্করোমি পশুমণ্ডলীমলিকমোহদুঘ্ধাশযাম্ .. ১৯..
প্রমত্তবারুণীরসৈর্বিঘূর্ণমানলোচনাঃ
       প্রচণ্ডদৈত্যসূদনাঃ প্রবিষ্টভক্তমানসাঃ .
উপোঢকজ্জলচ্ছবিচ্ছটাবিরাজিবিগ্রহঃ
      কপালশূলধারিণীঃ স্তুবে ত্বদীযদূতিকাঃ .. ২০..
স্ফূর্জন্নব্যযবাঙ্কুরোপলসিতাভোগৈঃ পুরঃ স্থাপিতৈ-
      র্দীপোদ্ভাসিশরাবশোভিতমুখৈঃ কুম্ভৈর্নবৈঃ শোভিনা .
স্বর্ণাবদ্ধবিচিত্ররত্নপটলীচঞ্চত্কপাটশ্রিযা
      যুক্তং দ্বারচতুষ্টযেন গিরিজে বন্দে মণী মন্দিরম্ .. ২১..
আস্তীর্ণারুণকম্বলাসনযুতং পুষ্পোপহারান্বিতং
       দীপ্তানেকমণিপ্রদীপসুভগং রাজদ্বিতানোত্তমম্ .
ধূপোদ্গারিসুগন্ধিসম্ভ্রমমিলদ্ভৃঙ্গাবলীগুঞ্জিতং
       কল্যাণং বিতনোতু মেঽনবরতং শ্রীমণ্ডপাভ্যন্তরম্ .. ২২..
কনকরচিতে পঞ্চপ্রেতাসনেন বিরাজিতে
       মণিগণচিতে রক্তশ্বেতাম্বরাস্তরণোত্তমে .
কুসুমসুরভৌ তল্পে দিব্যোপধানসুখাবহে
       হৃদযকমলে প্রাদুর্ভূতাং ভজে পরদেবতাম্ .. ২৩..
সর্বাঙ্গস্থিতিরম্যরূপরুচিরাং প্রাতঃ সমভ্যুত্থিতাং
       জৃম্ভামঞ্জুমুখাম্বুজাং মধুমদব্যাঘূর্ণদক্ষিত্রযাম্ .
সেবাযাতসমস্তসংনিধিসখীঃ সংমানযন্তীং দৃশা
       সংপশ্যন্পরদেবতাং পরমহো মন্যে কৃতার্থং জনুঃ .. ২৪..
উচ্চৈস্তোরণবর্তিবাদ্যনিবহধ্বানে সমুজ্জৃম্ভিতে
       ভক্তৈর্ভূমিবিলগ্নমৌলিভিরলং দণ্ডপ্রণামে কৃতে .
নানারত্নসমূহনদ্ধকথনস্থালীসমুদ্ভাসিতাং
       প্রাতস্তে পরিকল্পযামি গিরিজে নীরাজনামুজ্জ্বলাম্ .. ২৫..
পাদ্যং তে পরিকল্পযামি পদযোরর্ঘ্যং তথা হস্তযোঃ
       সৌধীভির্মধুপর্কমম্ব মধুরং ধারাভিরাস্বাদয .
তোযেনাচমনং বিধেহি শুচিনা গাঙ্গেন মত্কল্পিতং
       সাষ্টাঙ্গং প্রণিপাতমীশদযিতে দৃষ্ট্যা কৃতার্থী কুরু .. ২৬..
মাতঃ পশ্য মুখাম্বুজং সুবিমলে দত্তে মযা দর্পণে
       দেবি স্বীকুরু দন্তধাবনমিদং গঙ্গাজলেনান্বিতম্ .
সুপ্রক্ষালিতমাননং বিরচযন্স্নিগ্ধাম্বরপ্রোঞ্ছনং
       দ্রাগঙ্গীকুরু তত্ত্বমম্ব মধুরং তাম্বূলমাস্বাদয .. ২৭..
নিধেহি মণিপাদুকোপরি পদাম্বুজং মজ্জনা-
       লযং ব্রজ শনৈঃ সখীকৃতকরাম্বুজালম্বনম্ .
মহেশি করুণানিধে তব দৃগন্তপাতোত্সুকা-
       ন্বিলোকয মনাগমূনুভযসংস্থিতান্দৈবতান্ .. ২৮..
হেমরত্নবরণেন বেষ্টিতং
       বিস্তৃতারুণবিতানশোভিতম্ .
সজ্জসর্বপরিচারিকাজনং
       পশ্য মজ্জনগৃহং মনো মম .. ২৯..
কনককলশজালস্ফাটিকস্নানপীঠা-
       দ্যুপকরণবিশালং গন্ধমত্তালিমালম্ .
স্ফুরদরুণবিতাং মঞ্জুগন্ধর্বগানং
       পরমশিবমহেলে মজ্জনাগারমেহি .. ৩০..
পীনোত্তুঙ্গপযোধরাঃ পরিলসত্সংপূর্ণচন্দ্রাননা
       রত্নস্বর্ণবিনির্মিতাঃ পরিলসত্সূক্ষ্মাম্বরপ্রাবৃতাঃ .
হেমস্নানঘটীস্তথা মৃদুপটিরুদ্বর্তনং কৌসুমং
       তৈলং কঙ্কতিকং করেষু দধতীর্বন্দেঽম্ব তে দাসিকাঃ .. ৩১..
তত্র স্ফাটিকপীঠমেত্য শনকৈরুত্তারিতালঙ্কৃতি-
       র্নীচৈরুজ্ঝিতকঞ্চুকোপরিহিতারক্তোত্তরীযাম্বরা .
বেণীবন্ধমপাস্য কঙ্কতিকযা কেশপ্রসাদং মনা-
       ক্কুর্বাণা পরদেবতা ভগবতী চিত্তে মম দ্যোততাম্ .. ৩২..
অভ্যঙ্গং গিরিজে গৃহাণ মৃদুনা তৈলেন সংপাদিতং
       কাশ্মীরৈরগরুদ্রবৈর্মলযজৈরুদ্বর্তনং কারয .
গীতে কিংনরকামিনীভিরভিতো বাদ্যে মুদা বাদিতে
       নৃত্যন্তীমিহ পশ্য দেবি পুরতো দিব্যাঙ্গনামণ্ডলীম্ .. ৩৩..
কৃতপরিকরবন্ধাস্তুঙ্গপীনস্তনাঢ্যা
       মণিনিবহনিবদ্ধা হেমকুম্ভীর্দধানাঃ .
সুরভিসলিলনির্যদ্গন্ধলুব্ধালিমালাঃ
       সবিনযমুপতস্থুঃ সর্বতঃ স্নানদাস্যঃ .. ৩৪..
উদ্গন্ধৈরগরুদ্রবৈঃ সুরভিণা কস্তূরিকাবারিণা
       স্ফূর্জত্সৌরভযক্ষকর্দমজলৈঃ কাশ্মীরনীরৈরপি .
পুষ্পাম্ভোভিরশেষতীর্থসলিলৈঃ কর্পূরপাথোভরৈঃ
       স্নানং তে পরিকল্পযামি গিরিজে ভক্ত্যা তদঙ্গীকুরু .. ৩৫..
প্রত্যঙ্গং পরিমার্জযামি শুচিনা বস্ত্রেণ সংপ্রোঞ্ছনং
       কুর্বে কেশকলাপমাযততরং ধূপোত্তমৈর্ধূপিতম্ .
আলীবৃন্দবিনির্মিতাং যবনিকামাস্থাপ্যরত্নপ্রভং
       ভক্তত্রাণপরে মহেশগৃহিণি স্নানাম্বরং মুচ্যতাম্ .. ৩৬..
পীতং তে পরিকল্পযামি নিবিডং চণ্ডাতকং চণ্ডিকে
       সূক্ষ্মং স্নিগ্ধমুরীকুরুষ্ব বসনং সিন্দূরপূরপ্রভম্ .
মুক্তারত্নবিচিত্রহেমরচনাচারুপ্রভাভাস্বরং
       নীলং কঞ্চুকমর্পযামি গিরিশপ্রাণপ্রিযে সুন্দরি .. ৩৭..
বিলুলিতচিকুরেণ চ্ছাদিতাংসপ্রদেশে
       মণিনিকরবিরাজত্পাদুকান্যস্তপাদে .
সুললিতমবলম্ব্য দ্রাক্সখীমংসদেশে
       গিরিশগৃহিণি ভূষামণ্টপায প্রযাহি .. ৩৮..
লসত্কনককুট্টিমস্ফুরদমন্দমুক্তাবলী-
       সমুল্লসিতকান্তিভিঃ কলিতশক্রচাপব্রজে .
মহাভরণমণ্ডপে নিহিতহেমসিংহাসনং
       সখীজনসমাবৃতং সমধিতিষ্ঠ কাত্যাযনি .. ৩৯..
স্নিগ্ধং কঙ্কতিকামুখেন শনকৈঃ সংশোধ্য কেশোত্করং
       সীমন্তং বিরচয্য চারু বিমলং সিন্দূররেখান্বিতম্ .
মুক্তাভির্গ্রথিতালকাং মণিচিতৈঃ সৌবর্ণসূত্রৈঃ স্ফুটং
       প্রান্তে মৌক্তিকগুচ্ছকোপলতিকাং গ্রথ্নামি বেণীমিমাম্ .. ৪০..
বিলম্বিবেণীভুজগোত্তমাঙ্গ-
       স্ফুরন্মণিভ্রান্তিমুপানযন্তম্ .
স্বরোচিষোল্লাসিতকেশপাশং
       মহেশি চূডামণিমর্পযামি .. ৪১..
ত্বামাশ্রযদ্ভিঃ কবরীতমিস্রৈ-
       র্বন্দীকৃতং দ্রাগিব ভানুবিম্বম্ .
মৃডানি চূডামণিমাদধানং
       বন্দামহে তাবতমুত্তমাঙ্গম্ .. ৪২..
স্বমধ্যনদ্ধহাটকস্ফুরন্মণিপ্রভাকুলং
       বিলম্বিমৌক্তিকচ্ছটাবিরাজিতং সমন্ততঃ .
নিবদ্ধলক্ষচক্ষুষা ভবেন ভূরি ভাবিতং
       সমর্পযামি ভাস্বরং ভবানি ফালভূষণম্ .. ৪৩..
মীনাম্ভোরুহখঞ্জরীটসুষমাবিস্তারবিস্মারকে
       কুর্বাণে কিল কামবৈরিমনসঃ কন্দর্পবাণপ্রভাম্ .
মাধ্বীপানমদারুণেঽতিচপলে দীর্ঘে দৃগম্ভোরুহে
       দেবি স্বর্ণশলাকযোর্জিতমিদং দিব্যাঞ্জনং দীযতাম্ .. ৪৪..
মধ্যস্থারুণরত্নকান্তিরুচিরাং মুক্তামুগোদ্ভাসিতাং
       দৈবাদ্ভার্গবজীবমধ্যগরবের্লক্ষ্মীমধঃ কুর্বতীম্ .
উত্সিক্তাধরবিম্বকান্তিবিসরৈর্ভৌমীভবন্মৌক্তিকাং
       মদ্দত্তমুররীকুরুষ্ব গিরিজে নাসাবিভূষামিমাম্ .. ৪৫..
উডুকৃতপরিবেষস্পর্ধযা শীতভানো-
       রিব বিরচিতদেহদ্বন্দ্বমাদিত্যবিম্বম্ .
অরুণমণিসমুদ্যত্প্রান্তবিভ্রাজিমুক্তং
       শরবসি পরিনিধেহি স্বর্ণতাটঙ্কযুগ্মম্ .. ৪৬..
মরকতবরপদ্মরাগহীরো-
       ত্থিতগুলিকাত্রিতযাবনদ্ধমধ্যম্ .
বিততবিমলমৌক্তিকং চ
       কণ্ঠাভরণমিদং গিরিজে সমর্পযামি .. ৪৭..
নানাদেশসমুত্ত্থিতৈর্মণিগণপ্রোদ্যত্প্রভামণ্ডল-
       ব্যাপ্তৈরাভরণৈর্বিরাজিতগলাং মুক্তাচ্ছটালঙ্কৃতাম্ .
মধ্যস্থারুণরত্নকান্তিরুচিরাং প্রান্তস্থমুক্তাফল-
       ব্রাতামম্ব চতুষ্কিকাং পরশিবে বক্ষঃস্থলে স্থাপয .. ৪৮..
অন্যোন্যং প্লাবযন্তী সততপরিচলত্কান্তিকল্লোলজালৈঃ
       কুর্বাণা মজ্জদন্তঃকরণবিমলতাং শোভিতেব ত্রিবেণী .
মুক্তাভিঃ পদ্মরাগৈর্মরকতমণিভির্নির্মিতা দীপ্যমানৈ-
       র্নিত্যং হারত্রযী তে পরশিবরসিকে চেতসি দ্যোততাং নঃ .. ৪৯..
করসরসিজনালে বিস্ফুরত্কান্তিজালে
       বিলসদমলশোভে চঞ্চদীশাক্ষিলোভে .
বিবিধমণিমযূখোদ্ভাসিতং দেবি দুর্গে
       কনককটকযুগ্মং বাহুযুগ্মে নিধেহি .. ৫০..
ব্যালম্বমানসিতপট্টকগুচ্ছশোভি
       স্ফূর্জন্মণীঘটিতহারবিরোচমানম্ .
মাতর্মহেশমহিলে তব বাহুমূলে
       কেযূরকদ্বযমিদং বিনিবেশযামি .. ৫১..
বিততনিজমযূখৈর্নির্মিতামিন্দ্রনীলৈ-
       র্বিজিতকমলনালালীনমত্তালিমালাম্ .
মণিগণখচিতাভ্যাং কঙ্কণাভ্যামুপেতাং
       কলয বলযরাজীং হস্তমূলে মহেশি .. ৫২..
নীলপট্টমৃদুগুচ্ছশোভিতা-
       বদ্ধনৈকমণিজালমঞ্জুলাম্ .
অর্পযামি বলযাত্পুরঃসরে
       বিস্ফুরত্কনকতৈতৃপালিকাম্ .. ৫৩..
আলবালমিব পুষ্পধন্বনা
       বালবিদ্রুমলতাসু নির্মিতম্ .
অঙ্গুলীশু বিনিধীযতাং শনৈ-
       রঙ্গুলীযকমিদং মদর্পিতম্ .. ৫৪..
বিজিতহরমনোভূমত্তমাতঙ্গকুম্ভ-
       স্থলবিলুলিতকূজত্কিঙ্কিণীজালতুল্যাম্ .
অবিরতকলনদৈরীশচেতো হরন্তীং
       বিবিধমণিনিবদ্ধাং মেখলামর্পযামি .. ৫৫..
ব্যালম্বমানবরমৌক্তিকগুচ্ছশোভি
       বিভ্রাজিহাটকপুটদ্বযরোচমানম্ .
হেম্না বিনির্মিতমনেকমণিপ্রবন্ধং
       নীবীনিবন্ধনগুণং বিনিবেদযামি .. ৫৬..
বিনিহতনবলাক্ষাপঙ্কবালাতপৌঘে
       মরকতমণিরাজীমঞ্জুমঞ্জীরঘোষে .
অরুণমণিসমুদ্যত্কান্তিধারাবিচিত্র-
       স্তব চরণসরোজে হংসকঃ প্রীতিমেতু .. ৫৭..
নিবদ্ধশিতিপট্টকপ্রবরগুচ্ছসংশোভিতাং
       কলক্বণিতমঞ্জুলাং গিরিশচিত্তসংমোহনীম্ .
অমন্দমণিমণ্ডলীবিমলকান্তিকিম্মীরিতাং
       নিধেহি পদপঙ্কজে কনকঘুঙ্ঘুরূমম্বিকে .. ৫৮..
বিস্ফুরত্সহজরাগরঞ্জিতে
       শিঞ্জিতেন কলিতাং সখীজনৈঃ .
পদ্মরাগমণিনূপুরদ্বযী-
       মর্পযামি তব পাদপঙ্কজে .. ৫৯..
পদাম্বুজমুপাসিতুং পরিগতেন শীতাংশুনা
       কৃতাং তনুপরম্পরামিব দিনান্তরাগারুণাম্ .
মহেশি নবযাবকদ্রবভরেণ শোণীকৃতাং
       নমামি নখমণ্ডলীং চরণপঙ্কজস্থাং তব .. ৬০..
আরক্তশ্বেতপীতস্ফুরদুরুকসুমৈশ্চিত্রিতাং পট্টসূত্রৈ-
       র্দেবস্ত্রীভিঃ প্রযত্নাদগরুসমুদিতৈর্ধূপিতাং দিব্যধূপৈঃ .
উদ্যদ্গন্ধান্ধপুষ্পংধযনিবহসমারব্ধঝাঙ্কারগীতাং
       চঞ্চত্কহ্লারমালাং পরশিবরসিকে কণ্ঠপীঠেঽর্পযামি .. ৬১..
গৃহাণ পরমামৃতং কনকপাত্রসংস্থাপিতং
       সমর্পয মুখাম্বুজে বিমলবীটিকামম্বিকে .
বিলোকয মুখাম্বুজং মুকুরমণ্ডলে নির্মলে
       নিধেহি মণিপাদুকোপরি পদাম্বুজং সুন্দরি .. ৬২..
আলম্ব্য স্বসখীং করেণ শনকৈঃ সিংহাসনাদুত্থিতা
       কূজন্মন্দমরালমঞ্জুলগতিপ্রোল্লাসিভূষাম্বর .
আনন্দপ্রতিপাদকৈরুপনিষদ্বাক্যৈঃ স্তুতা বেধসা
       মচ্চিত্তে স্থিরতামুপৈতু গিরিজা যান্তী সভামণ্ডপম্ .. ৬৩..
চলন্ত্যামম্বাযাং প্রচলতি সমস্তে পরিজনে
       সবেগং সংযাতে কনকলতিকালঙ্কৃতিভরে .
সমতাদুত্তালস্ফুরিতপদসংপাতজনিতৈ-
       র্ঝণত্কারৈস্তারৈর্ঝণঝণিতমাসীন্মণিগৃহম্ .. ৬৪..
চঞ্চদ্বেত্রকরাভিরঙ্গবিলসদ্ভূষাম্বরাভিঃ পুরো-
       যন্তীভিঃ পরিচারিকাভিরমরব্রাতে সমুত্সারিতে .
রুদ্ধে নির্জরসুন্দরীভিরভিতঃ কক্ষান্তরে নির্গতং
       বন্দে নন্দিতশম্ভু নির্মলচিদানন্দৈকরূপং মহঃ .. ৬৫..
বেধাঃ পাদতলে পতত্যযমসৌ বিষ্ণুর্নমত্যগ্রতঃ
       শম্ভুর্দেহি দৃগঞ্চলং সুরপতিং দূরস্থমালোকয .
ইত্যেবং পরিচারিকাভিরুদিতে সংমাননাং কুর্বতী
       দৃগ্দ্বন্দ্বেন যথোচিতং ভগবতী ভূযাদ্বিভূত্যৈ মম .. ৬৬..
মন্দং চারণসুন্দরীভিরভিতো যান্তীভিরুত্কণ্ঠযা
       নামোচ্চারণপূর্বকং প্রতিদিশং প্রত্যেকমাবেদিতাত্ .
বেগাদক্ষিপথং গতান্সুরগণানালোকযন্তী শনৈ-
       র্দিত্সন্তী চরণাম্বুজং পথি জগত্পাযান্মহেশপ্রিযা .. ৬৭..
অগ্রে কেচন পার্শ্বযোঃ কতিপযে পৃষ্ঠে পরে প্রস্থিতা
       আকাশে সমবস্থিতাঃ কতিপযে দিক্ষু স্থিতাশ্চাপরে .
সংমর্দং শনকৈরপাস্য পুরতো দণ্ডপ্রণামান্মুহুঃ
       কুর্বাণাঃ কতিচিত্সুরা গিরিসুতে দৃক্পাতমিচ্ছন্তি তে .. ৬৮..
অগ্রে গাযতি কিংনরী কলপদং গন্ধর্বকান্তাঃ শনৈ-
       রাতোদ্যানি চ বাদযন্তি মধুরং সব্যাপসব্যস্থিতাঃ .
কূজন্নূপুরনাদ মঞ্জু পুরতো নৃত্যন্তি দিব্যাঙ্গনা
       গচ্ছন্তঃ পরিতঃ স্তুবন্তি নিগমস্তুত্যা বিরিঞ্চ্যাদযঃ .. ৬৯..
কস্মৈচিত্সুচিরাদুপাসিতমহামন্ত্রৌঘসিদ্ধিং ক্রমা-
       দেকস্মৈ ভবনিঃস্পৃহায পরমানন্দস্বরূপাং গতিম্ .
অন্যস্মৈ বিষযানুরক্তমনসে দীনায দুঃখাপহং
       দ্রব্যং দ্বারসমাশ্রিতায দদতীং বন্দামহে সুন্দরীম্ .. ৭০..
নম্রীভূয কৃতাঞ্জলিপ্রকটিতপ্রেমপ্রসন্নাননে
       মন্দং গচ্ছতি সংনিধৌ সবিনযাত্সোত্কণ্ঠমোঘত্রযে .
নানামন্ত্রগণং তদর্থমখিলং তত্সাধনং তত্ফলং
       ব্যাচক্ষাণমুদগ্রকান্তি কলযে যত্কিঞ্চিদাদ্যং মহঃ .. ৭১..
তব দহনসদৃক্ষৈরীক্ষণৈরেব চক্ষু-
       র্নিখিলপশুজনানাং ভীষযদ্ভীষণাস্যম্ .
কৃতবসতি পরেশপ্রেযসি দ্বারি নিত্যং
       শরভমিথুনমুচ্চৈর্ভক্তিযুক্তো নতোঽস্মি .. ৭২..
কল্পান্তে সরসৈকদাসমুদিতানেকার্কতুল্যপ্রভাং
       রত্নস্তম্ভনিবদ্ধকাঞ্চনগুণস্ফূর্জদ্বিতানোত্তমাম্ .
কর্পূরাগরুগর্ভবর্তিকলিকাপ্রাপ্তপ্রদীপাবলীং
       শ্রীচক্রাকৃতিমুল্লসন্মণিগণাং বন্দামহে বেদিকাম্ .. ৭৩..
স্বস্থানস্থিতদেবতাগণবৃতে বিন্দৌ মুদা স্থাপিতং
       নানারত্নবিরাজিহেমবিলসত্কান্তিচ্ছটাদুর্দিনম্ .
চঞ্চত্কৌসুমতূলিকাসনযুতং কামেশ্বরাধিষ্ঠিতং
       নিত্যানন্দনিদানমম্ব সততং বন্দে চ সিংহাসনম্ .. ৭৪..
বদদ্ভিরভিতো মুদা জয জযেতি বৃন্দারকৈঃ
       কৃতাঞ্জলিপরম্পরা বিদধতি কৃতার্থা দৃশা .
অমন্দমণিমণ্ডলীখচিতহেমসিংহাসনং
       সখীজনসমাবৃতং সমধিতিষ্ঠ দাক্ষাযণি .. ৭৫..
কর্পূরাদিকবস্তুজাতমখিলং সৌবর্ণভৃঙ্গারকং
       তাম্বূলস্য করণ্ডকং মণিমযং চৈলাঞ্চলং দর্পণম্ .
বিস্ফূর্জন্মণিপাদুকে চ দধতীঃ সিংহাসনস্যাভিত-
       স্তিষ্ঠন্তীঃ পরিচারিকাস্তব সদা বন্দামহে সুন্দরি .. ৭৬..
ত্বদমলবপুরুদ্যত্কান্তিকল্লোলজালৈঃ
       স্ফুটমিব দধতীভির্বাহুবিক্ষেপলীলাম্ .
মুহুরপি চ বিধূতে চামরগ্রাহিণীভিঃ
       সিতকরকরশুভ্রে চামরে চালযামি .. ৭৭..
প্রান্তস্ফুরদ্বিমলমৌক্তিকগুচ্ছজালং
       চঞ্চন্মহামণিবিচিত্রিতহেমদণ্ডম্ .
উদ্যত্সহস্রকরমণ্ডলচারু হেম-
       চ্ছত্রং মহেশমহিলে বিনিবেশযামি .. ৭৮..
উদ্যত্তাবকদেহকান্তিপটলীসিন্দূরপূরপ্রভা-
       শোণীভূতমুদগ্রলোহিতমণিচ্ছেদানুকারিচ্ছবি .
দূরাদাদরনির্মিতাঞ্জলিপুটৈরালোকমানং সুর-
       ব্যূহৈঃ কাঞ্চনমাতপত্রমতুলং বন্দামহে সুন্দরম্ .. ৭৯..
সন্তুষ্টাং পরমামৃতেন বিলসত্কামেশ্বরাঙ্কস্থিতাং
       পুষ্পৌঘৈরভিপূজিতাং ভগবতীং ত্বাং বন্দমানা মুদা .
স্ফূর্জত্তাবকদেহরশ্মিকলনাপ্রাপ্তস্বরূপাভিদাঃ
       শ্রীচক্রাবরণস্থিতাঃ সবিনযং বন্দামহে দেবতাঃ .. ৮০..
আধারশক্ত্যাদিকমাকলয্য
       মধ্যে সমস্তাধিকযোগিনীং চ .
মিত্রেশনাথাদিকমত্র নাথ-
       চতুষ্টযং শৈলসুতে নতোঽস্মি .. ৮১..
ত্রিপুরাসুধার্ণবাসন-
       মারভ্য ত্রিপুরমালিনী যাবত্ .
আবরণাষ্টকসংস্থিত-
       মাসনষট্কং নমামি পরমেশি .. ৮২..
ঈশানে গণপং স্মরামি বিচরদ্বিঘ্নান্ধকারচ্ছিদং
       বাযব্যে বটুকং চ কজ্জলরুচিং ব্যালোপবীতান্বিতম্ .
নৈরৃত্যে মহিষাসুরপ্রমথিনীং দুর্গাং চ সংপূজয-
       ন্নাগ্নেযেঽখিলভক্তরক্ষণপরং ক্ষেত্রাধি নাথং ভজে .. ৮৩..
উড্যানজালন্ধরকামরূপ-
       পীঠানিমান্পূর্ণগিরিপ্রসক্তান্ .
ত্রিকোণদক্ষাগ্রিমসব্যভাগ-
       মধ্যস্থিতান্সিদ্ধিকরান্নমামি .. ৮৪..
লোকেশঃ পৃথিবীপতির্নিগদিতো বিষ্ণুর্জলানাং প্রভু-
       স্তেজোনাথ উমাপতিশ্চ মরুতামীশস্তথা চেশ্বরঃ .
আকাশাধিপতিঃ সদাশিব ইতি প্রেতাভিধামাগতা-
       নেতাংশ্চক্রবহিঃস্থিতান্সুরগণান্বন্দামহে সাদরম্ .. ৮৫..
তারানাথকলাপ্রবেশনিগমব্যাজাদ্গতাসুপ্রথং
       ত্রৈলোক্যে তিথিষু প্রবর্তিতকলাকাষ্ঠাদিকালক্রমম্ .
রত্নালঙ্কৃতিচিত্রবস্ত্রললিতং কামেশ্বরীপূর্বকং
       নিত্যাষোডশকং নমামি লসিতং চক্রাত্মনোরন্তরে .. ৮৬..
হৃদি ভাবিতদৈবতং প্রযত্না-
       ভ্যুপদেশানুগৃহীতভক্তসঙ্ঘম্ .
স্বগুরুক্রমসংজ্ঞচক্ররাজ-
       স্থিতমোঘত্রযমানতোঽস্মি মূর্ধ্না .. ৮৭..
হৃদযমথ শিরঃ শিখাখিলাদ্যে
       কবচমথো নযনত্রযং চ দেবি .
মুনিজনপরিচিন্তিত তথাস্ত্রং
       স্ফুরতু সদা হৃদযে ষডঙ্গমেতত্ .. ৮৮..
ত্রৈলোক্যমোহনমিতি প্রথিতে তু চক্রে
       চঞ্চদ্বিভূষণগণত্রিপুরাধিবাসে .
রেখাত্রযে স্থিতবতীরণিমাদিসিদ্ধী-
       র্মুদ্রা নমামি সততং প্রকটাভিধাস্তাঃ .. ৮৯..
সর্বাশাপরিপূরকে বসুদলদ্বন্দ্বেন বিভ্রাজিতে
       বিস্ফূর্জন্ত্রিপুরেশ্বরীনিবসতৌ চক্রে স্থিতা নিত্যশঃ .
কামাকর্ষণিকাদযো মণিগণভ্রাজিষ্ণুদিব্যাম্বরা
       যোগিন্যঃ প্রদিশন্তু কাঙ্ক্ষিতফলং বিখ্যাতগুপ্তাভিধাঃ .. ৯০..
মহেশি বসুভির্দলৈর্লসতি সর্বসংক্ষোভণে
       বিভূষণগণস্ফুরন্ত্রিপুরসুন্দরীসদ্মনি .
অনঙ্গকুসুমাদযো বিবিধভূষণোদ্ভাসিতা
       দিশন্তু মম কাঙ্ক্ষিতং তনুতরাশ্চ গুপ্তাভিধাঃ .. ৯১..
লসদ্যুগদৃশারকে স্ফুরতি সর্বসৌভাগ্যদে
       শুভাভরণভূষিতত্রিপুরবাসিনীমন্দিরে .
স্থিতা দধতু মঙ্গলং সুভগসর্বসংক্ষোভিণী-
       মুখাঃ সকলসিদ্ধযো বিদিতসংপ্রদাযাভিধাঃ .. ৯২..
বহির্দশারে সর্বার্থসাধকে ত্রিপুরাশ্রযাঃ .
কুলকৌলাভিধাঃ পান্তু সর্বসিদ্ধিপ্রদাযিকাঃ .. ৯৩..
অন্তঃশোভিদশারকেঽতিললিতে সর্বাদিরক্ষাকরে
       মালিন্যা ত্রিপুরাদ্যযা বিরচিতাবাসে স্থিতং নিত্যশঃ .
নানারত্নবিভূষণং মণিগণভ্রাজিষ্ণু দিব্যাম্বরং
       সর্বজ্ঞাদিকশক্তিবৃন্দমনিশং বন্দে নিগর্ভাভিধম্ .. ৯৪..
সর্বরোগহরেঽষ্টারে ত্রিপুরাসিদ্ধযান্বিতে .
রহস্যযোগিনীর্নিত্যং বশিন্যাদ্যা নমাম্যহম্ .. ৯৫..
চূতাশোকবিকাসিকেতকরজঃপ্রোদ্ভাসিনীলাম্বুজ-
       প্রস্ফূর্জন্নবমল্লিকাসমুদিতৈঃ পুষ্পৈঃ শরান্নির্মিতান্ .
রম্যং পুষ্পশরাসনং সুললিতং পাশং তথা চাঙ্কুশং
       বন্দে তাবকমাযুধং পরশিবে চক্রান্তরালেস্থিতম্ .. ৯৬..
ত্রিকোণ উদিতপ্রভে জগতি সর্বসিদ্ধিপ্রদে
       যুতে ত্রিপুরযাম্বযা স্থিতবতী চ কামেশ্বরী .
তনোতু মম মঙ্গলং সকলশর্ম বজ্রেশ্বরী
       করোতু ভগমালিনী স্ফুরতু মামকে চেতসি .. ৯৭..
সর্বানন্দমযে সমস্তজগতামাকাঙ্ক্ষিতে বৈন্দবে
       ভৈরব্যা ত্রিপুরাদ্যযা বিরচিতাবাসে স্থিতা সুন্দরী .
আনন্দোল্লসিতেক্ষণা মণিগণভ্রাজিষ্ণুভূষাম্বরা
       বিস্ফূর্জদ্বদনা পরাপররহঃ স মাং পাতু যোগিনী .. ৯৮..
উল্লসত্কনককান্তিভাসুরং
       সৌরভস্ফুরণবাসিতাম্বরম্ .
দূরতঃ পরিহৃতং মধুব্রতৈ-
       রর্পযামি তব দেবি চম্পকম্ .. ৯৯..
বৈরমুদ্ধতমপাস্য শম্ভুনা
       মস্তকে বিনিহিতং কলাচ্ছলাত্ .
গন্ধলুব্ধমধুপাশ্রিতং সদা
       কেতকীকুসুমমর্পযামি তে .. ১০০..
চূর্ণীকৃতং দ্রাগিব পদ্মজেন
       ত্বদাননস্পর্ধিসুধাংশুবিম্বম্ .
সমর্পযামি স্ফুটমঞ্জলিস্থং
       বিকাসিজাতীকুসুমোত্করং তে .. ১০১..
অগরুবহলধূপাজস্রসৌরভ্যরম্যাং
       মরকতমণিরাজীরাজিহারিস্রগাভাম্ .
দিশি বিদিশি বিসরদ্গন্ধলুব্ধালিমালাং
       বকুলকুসুমমালাং কণ্ঠপীঠেঽর্পযামি .. ১০২..
ঈঙ্কারোর্ধ্বগবিন্দুরাননমধোবিন্দুদ্বযং চ স্তনৌ
       ত্রৈলোক্যে গুরুগম্যমেতদখিলং হার্দং চ রেখাত্মকম্ .
ইত্থং কামকলাত্মিকাং ভগবতীমন্তঃ সমারাধয-
       ন্নানন্দাম্বুধিমজ্জনে প্রলভতামানন্দথুং সজ্জনঃ .. ১০৩..
ধূপং তেঽগরুসংভবং ভগবতি প্রোল্লাসিগন্ধোদ্ধুরং
       দীপং চৈব নিবেদযামি মহসা হার্দান্ধকারচ্ছিদম্ .
রজস্বর্ণবিনির্মিতেষু পরিতঃ পাত্রেষু সংস্থাপিতং
       নৈবেদ্যং বিনিবেদযামি পরমানন্দাত্মিকে সুন্দরি .. ১০৪..
জাতীকোরকতুল্যমোদনমিদং সৌবর্ণপাত্রে স্থিতং
       শুদ্ধান্নং শুচি মুদ্গমাষচণকোদ্ভূতাতথা সূপকাঃ .
প্রাজ্যং মাহিষমাজ্যমুত্তমমিদং হৈবংগবীনং পৃথ-
       ক্পাত্রেষু প্রতিপাদিতং পরশিবে তত্সর্বমঙ্গীকুরু .. ১০৫..
শিম্বীসূরণশাকবিম্ববৃহতীকূশ্মাণ্ডকোশাতকী-
       বৃন্তাকানি পটোলকানি মৃদুনা সংসাধিতান্যগ্নিনা .
সংপন্নানি চ বেসবারবিসরৈর্দিব্যানি ভক্ত্যা কৃতা-
       ন্যগ্রে তে বিনিবেদযামি গিরিজে সৌবর্ণপাত্রব্রজে .. ১০৬..
নিম্বূকার্দ্রকচূতকন্দকদলীকৌশাতকীকর্কটী-
       ধাত্রীবিল্বকরীরকৈর্বিরচিতান্যানন্দচিদ্বিগ্রহে .
রাজীভিঃ কটুতৈলসৈন্ধবহরিদ্রাভিঃ স্থিতান্পাতযে
       সংধানানি নিবেদযামি গিরিজে ভূরিপ্রকারাণি তে .. ১০৭..
সিতযাঞ্চিতলড্ডুকব্রজা-
       ন্মৃদুপূপান্মৃদুলাশ্চ পূরিকাঃ .
পরমান্নমিদং চ পার্বতি
       প্রণযেন প্রতিপাদযামি তে .. ১০৮..
দিগ্ধমেতদনলে সুসাধিতং
       চন্দ্রমণ্ডলনিভং তথা দধি .
ফাণিতং শিখরিণীং সিতাসিতাং
       সর্বমম্ব বিনিবেদযামি তে .. ১০৯..
অগ্রে তে বিনিবেদ্য সর্বমমিতং নৈবেদ্যমঙ্গীকৃতং
       জ্ঞাত্বা তত্ত্বচতুষ্টযং প্রথমতো মন্যে সুতৃপ্তাং ততঃ .
দেবীং ত্বাং পরিশিষ্টমম্ব কনকামত্রেষু সংস্থাপিতং
       শক্তিভ্যঃ সমুপাহারামি সকলং দেবেশি শম্ভুপ্রিযে .. ১১০..
বামেন স্বর্ণপাত্রীমনুপমপরমান্নেন পূর্ণাং দধানা-
       মন্যেন স্বর্ণদর্বীং নিজজনহৃদযাভীষ্টদাং ধারযন্তীম্ .
সিন্দূরারক্তবস্ত্রাং বিবিধমণিলসদ্ভূষণাং মেচকাঙ্গীং
       তিষ্ঠন্তীমগ্রতস্তে মধুমদমুদিতামন্নপূর্ণাং নমামি .. ১১১..
পঙ্ক্ত্যোপবিষ্টান্পরিতস্তু চক্রং
       শক্ত্যা স্বযালিঙ্গিতবামভাগান্ .
সর্বোপচারৈঃ পরিপূজ্য ভক্ত্যা
       তবাম্বিকে পারিষদান্নমামি .. ১১২..
পরমামৃতমত্তসুন্দরী-
       গণমধ্যস্থিতমর্কভাসুরম্ .
পরমামৃতঘূর্ণিতেক্ষণং
       কিমপি জ্যোতিরুপাস্মহে পরম্ .. ১১৩..
দৃশ্যতে তব মুখাম্বুজং শিবে
       শ্রূযতে স্ফুটমনাহতধ্বনিঃ .
অর্চনে তব গিরামগোচরে
       ন প্রযাতি বিষযান্তরং মনঃ .. ১১৪..
ত্বন্মুখাম্বুজবিলোকনোল্লস-
       ত্প্রেমনিশ্চলবিলোচনদ্বযীম্ .
উন্মনীমুপগতাং সভামিমাং
       ভাবযামি পরমেশি তাবকীম্ .. ১১৫..
চক্ষুঃ পশ্যতু নেহ কিংচন পরং ঘ্রাণং ন বা জিঘ্রতু
       শ্রোত্রং হন্ত শ্রুণোতু ন ত্বগপি ন স্পর্শং সমালম্বতাম্ .
জিহ্বা বেত্তু ন বা রসং মম পরং যুষ্মত্স্বরূপামৃতে
       নিত্যানন্দবিঘূর্ণমাননযনে নিত্যং মনো মজ্জতু .. ১১৬..
যস্ত্বাং পশ্যতি পার্বতি প্রতিদিনং ধ্যানেন তেজোমযীং
       মন্যে সুন্দরি তত্ত্বমেতদখিলং বেদেষু নিষ্ঠাং গতম্ .
যস্তস্মিন্সমযে তবার্চনবিধাবানন্দসান্দ্রাশযো
       যাতোঽহং তদভিন্নতাং পরশিবে সোঽযং প্রসাদস্তব .. ১১৭..
গণাধিনাথং বটুকং চ যোগিনীঃ
       ক্ষেত্রাধিনাথং চ বিদিক্চতুষ্টযে .
সর্বোপচারৈঃ পরিপূজ্য ভক্তিতো
       নিবেদযামো বলিমুক্তযুক্তিভিঃ .. ১১৮..
বীণামুপান্তে খলু বাদযন্ত্যৈ
       নিবেদ্য শেষং খলু শেষিকাযৈ .
সৌবর্ণভৃঙ্গারবিনির্গতেন
       জলেন শুদ্ধাচমনং বিধেহি .. ১১৯..
তাম্বূলং বিনিবেদযামি বিলসত্কর্পূরকস্তূরিকা-
       জাতীপূগলবঙ্গচূর্ণখদিরৈর্ভক্ত্যা সমুল্লাসিতম্ .
স্ফূর্জদ্রত্নসমুদ্গকপ্রণিহিতং সৌবর্ণপাত্রে স্থিতৈ-
       র্দীপৈরুজ্জ্বলমান্নচূর্ণরচিতৈরারার্তিকং গৃহ্যতাম্ .. ১২০..
কাচিদ্গাযতি কিংনরী কলপদং বাদ্যং দধানোর্বশী
       রম্ভা নৃত্যতি কেলিমঞ্জুলপদং মাতঃ পুরস্তাত্তব .
কৃত্যং প্রোজ্ঝ্য সুরস্ত্রিযো মধুমদব্যাঘূর্ণমানেক্ষণং
       নিত্যানন্দসুধাম্বুধিং তব মুখং পশ্যন্তি দৃশ্যন্তি চ .. ১২১..
তাম্বূলোদ্ভাসিবক্ত্রৈস্ত্বদমলবদনালোকনোল্লাসিনেত্রৈ-
       শ্চক্রস্থৈঃ শক্তিসঙ্ঘৈঃ পরিহৃতবিষযাসঙ্গমাকর্ণ্যমানম্ .. ১২২..
অর্চাবিধৌ জ্ঞানলবোঽপি দূরে
       দূরে তদাপাদকবস্তুজাতম্ .
প্রদক্ষিণীকৃত্য ততোঽর্চনং তে
       পঞ্চোপচারাত্মকমর্পযামি .. ১২৩..
যথেপ্সিতমনোগতপ্রকটিতোপচারার্চিতং
       নিজাবরণদেবতাগণবৃতাং সুরেশস্থিতাম্ .
কৃতাঞ্জলিপুটো মুহুঃ কলিতভূমিরষ্টাঙ্গকৈ-
       র্নমামি ভগবত্যহং ত্রিপুরসুন্দরি ত্রাহি মাম্ .. ১২৪..
বিজ্ঞপ্তীরবধেহি মে সুমহতা যত্নেন তে সংনিধিং
       প্রাপ্তং মামিহ কান্দিশীকমধুনা মাতর্ন দূরীকুরু .
চিত্তং ত্বত্পদভাবনে ব্যভিচরেদ্দৃগ্বাক্চ মে জাতু চে-
       ত্তত্সৌম্যে স্বগুণৈর্বধান ন যথা ভূযো বিনির্গচ্ছতি .. ১২৫..
ক্বাহং মন্দমতিঃ ক্ব চেদমখিলৈরেকান্তভক্তৈঃ স্তুতং
       ধ্যাতং দেবি তথাপি তে স্বমনসা শ্রীপাদুকাপূজনম্ .
কাদাচিত্কমদীযচিন্তনবিধৌ সন্তুষ্টযা শর্মদং
       স্তোত্রং দেবতযা তযা প্রকটিতং মন্যে মদীযাননে .. ১২৬..
নিত্যার্চমিদং চিত্তে ভাব্যমানং সদা মযা .
নিবদ্ধং বিবিধৈঃ পদ্যৈরনুগৃহ্ণাতু সুন্দরী .. ১২৭..
ইতি শ্রীমত্পরমহংসপরিব্রাজকাচার্যস্য
শ্রীগোবিন্দভগবত্পূজ্যপাদশিষ্যস্য
শ্রীমচ্ছঙ্করভগবতঃ কৃতৌ
ত্রিপুরসুন্দরীমানসপূজাস্তোত্রং
সংপূর্ণম্ ..