আর্যাপঞ্চদশীস্তোত্রম্

.. আর্যাপঞ্চদশীস্তোত্রম্ ..
করকলিতচাপবাণাং কল্হারাঙ্ঘ্রিং নমামি কল্যাণীম্ .
কংদর্পদর্পজননীং কলুষহরাং কামিতার্থফলদাত্রীম্ .. ১ ..
এষা স্তোতুম্ বাণী নৈব সমর্থা তবেশি মহিমানম্ .
শেষোঽপ্যব্দসহস্রৈঃ শেষং কৃতবান্ মহেশি তব চরিতম্ .. ২ ..
ঈশিত্বাদিসুপূজ্যামিন্দিন্দিরকেশাভারসূল্লসিতাম্ .
ইন্দীবরদলনযনামীপ্সিতদাত্রীং নমামি শর্বাণীম্ .. ৩ ..
লসদরুণভানুকোটিদ্যুতিনিধিমম্বাং সুরেন্দ্রলক্ষ্যপদাম্ .
ললিতাং নমামি বালে ললিতশিবহৃদযকমলকলহংসীম্ .. ৪ ..
হ্রীংকারবীজরূপে হিমগিরিকন্যে হরীন্দ্রভববন্দ্যে .
হিমকরধবলচ্ছত্রে হিতায ভব নঃ সদা মহারাজ্ঞি .. ৫ ..
হর্ষোত্করজনযিত্রী হসিতজ্যোত্স্না তবেযমনবদ্যে .
হরগলহালাহলমপি হরতি ত্রৈলোক্যমোহতিমিরং তে .. ৬ ..
সকলমনোরথদানে সত্যপি চরণে নতস্য তব নিপুণে .
সংসেব্যতে সুরতরুঃ সদাজ্ঞলোকৈর্নু কৃচ্ছ্রফলদাতা .. ৭ ..
কনকরুচে চটুলগতে কঠিনস্তনভারনম্রকৃশমধ্যে .
কান্তে কঙ্কণহস্তে কম্বুগ্রীবে নমোঽস্তু তে করুণে .. ৮ ..
হরনযনানন্দকরে হরাঙ্কসংস্থে হরিপ্রমুখবন্দ্যে .
হরনটনসাক্ষিভূতে হরার্ধদেহে নমোঽস্তু তে সুকৃপে .. ৯ ..
লক্ষ্মীপ্রদকরুণা যা লক্ষ্মীপতিমল্পমম্ব কর্তুমলম্ .
লক্ষ্যম্ কুরু মাং তস্যা লাবণ্যামৃততরঙ্গমালে ত্বম্ .. ১০ ..
হ্রীংকাররত্নগর্ভে হেমাচলমন্দরস্তনোল্লসিতে .
হেরম্বপ্রিযজননি হে বসুধে দেহি মে ক্ষমাং নিত্যম্ .. ১১ ..
সত্সংপ্রদাযবিদিতে সকলাগমনিগমসারতত্ত্বমযি .
সাবিত্র্যর্পয বদনে সকলরসাশ্রযসুবাক্সুধাধারাম্ .. ১২ ..
করকঙ্কণমণিদিনমণিকরবিকসিতচরণকমলমকরন্দম্ .
করুণাপযোনিধে মে কামাক্ষি স্বান্তষট্পদঃ পিবতু .. ১৩ ..
লসদিক্ষুচাপসুমশরলক্ষিতদোর্বল্লিবীর্যমভযেন .
লক্ষাধিকদৈত্যকুলং লবুপটবাসং কৃতং কথং চিত্রম্ .. ১৪ ..
হ্রীংকারকেলিভবনে হিমকরমৌল্যঙ্কমঞ্জুপর্যঙ্কে .
হৃদযসরোজে মে বস হৃদযানন্দপ্রবোধপরহংসি .. ১৫ ..
আর্যাপঞ্চদশীং তামার্যাং যো ভজতি শুদ্ধধীর্নিত্যম্ .
ভার্যে লক্ষ্মীবাণ্যৌ পর্যাতাত্ তস্য সাদরং ভবতঃ .. ১৬ ..
ইত্যানন্দনাথপাদপদ্মোপজীবিনা কাশ্যপগোত্রোত্পন্নেনান্ধ্রেণ
ত্যাগরাজনাম্না বিরচিতমার্যাপঞ্চদশীস্তোত্রং সংপূর্ণম্