বিনাযকস্তোত্র

.. বিনাযকস্তোত্র ..

মূষিকবাহন মোদকহস্ত চামরকর্ণ বিলম্বিতসূত্র .
বামনরূপ মহেশ্বরপুত্র বিঘ্নবিনাযক পাদ নমস্তে  ..

দেবদেবসুতং দেবং জগদ্বিঘ্নবিনাযকম্ .
হস্তিরূপং মহাকাযং সূর্যকোটিসমপ্রভম্ .. ১..

বামনং জটিলং কান্তং হ্রস্বগ্রীবং মহোদরম্ .
ধূম্রসিন্দূরযুদ্গণ্ডং বিকটং প্রকটোত্কটম্ .. ২..

একদন্তং প্রলম্বোষ্ঠং নাগযজ্ঞোপবীতিনম্ .
ত্র্যক্ষং গজমুখং কৃষ্ণং সুকৃতং রক্তবাসসম্ .. ৩..

দন্তপাণিং চ বরদং ব্রহ্মণ্যং ব্রহ্মচারিণম্ .
পুণ্যং গণপতিং দিব্যং বিঘ্নরাজং নমাম্যহম্ .. ৪..

দেবং গণপতিং নাথং বিশ্বস্যাগ্রে তু গামিনম্ .
দেবানামধিকং শ্রেষ্ঠং নাযকং সুবিনাযকম্ .. ৫..

নমামি ভগবং দেবং অদ্ভুতং গণনাযকম্ .
বক্রতুণ্ড প্রচণ্ডায উগ্রতুণ্ডায তে নমঃ  .. ৬..

চণ্ডায গুরুচণ্ডায চণ্ডচণ্ডায তে নমঃ  .
মত্তোন্মত্তপ্রমত্তায নিত্যমত্তায তে নমঃ  .. ৭..

উমাসুতং নমস্যামি গঙ্গাপুত্রায তে নমঃ .
ওঙ্কারায বষট্কার স্বাহাকারায তে নমঃ  .. ৮..

মন্ত্রমূর্তে মহাযোগিন্ জাতবেদে নমো নমঃ .
পরশুপাশকহস্তায গজহস্তায তে নমঃ  .. ৯..

মেঘায মেঘবর্ণায মেঘেশ্বর নমো নমঃ .
ঘোরায ঘোররূপায ঘোরঘোরায তে নমঃ  .. ১০..

পুরাণপূর্বপূজ্যায পুরুষায নমো নমঃ .
মদোত্কট নমস্তেঽস্তু নমস্তে চণ্ডবিক্রম  .. ১১..

বিনাযক নমস্তেঽস্তু নমস্তে ভক্তবত্সল .
ভক্তপ্রিযায শান্তায মহাতেজস্বিনে নমঃ  .. ১২..

যজ্ঞায যজ্ঞহোত্রে চ যজ্ঞেশায নমো নমঃ .
নমস্তে শুক্লভস্মাঙ্গ শুক্লমালাধরায চ  .. ১৩..

মদক্লিন্নকপোলায গণাধিপতযে নমঃ .
রক্তপুষ্প প্রিযায চ রক্তচন্দন ভূষিত  .. ১৪..

অগ্নিহোত্রায শান্তায অপরাজয্য তে নমঃ .
আখুবাহন দেবেশ একদন্তায তে নমঃ  .. ১৫..

শূর্পকর্ণায শূরায দীর্ঘদন্তায তে নমঃ .
বিঘ্নং হরতু দেবেশ শিবপুত্রো বিনাযকঃ  .. ১৬..

ফলশ্রুতি

জপাদস্যৈব হোমাচ্চ সন্ধ্যোপাসনসস্তথা .
বিপ্রো ভবতি বেদাঢ্যঃ ক্ষত্রিযো বিজযী ভবেত্  ..

বৈশ্যো ধনসমৃদ্ধঃ স্যাত্ শূদ্রঃ পাপৈঃ প্রমুচ্যতে .
গর্ভিণী জনযেত্পুত্রং কন্যা ভর্তারমাপ্নুযাত্  ..

প্রবাসী লভতে স্থানং বদ্ধো বন্ধাত্ প্রমুচ্যতে .
ইষ্টসিদ্ধিমবাপ্নোতি পুনাত্যাসত্তমং কুলং  ..

সর্বমঙ্গলমাঙ্গল্যং সর্বপাপপ্রণাশনম্ .
সর্বকামপ্রদং পুংসাং পঠতাং শ্রুণুতামপি  ..

.. ইতি শ্রীব্রহ্মাণ্ডপুরাণে স্কন্দপ্রোক্ত বিনাযকস্তোত্রং সম্পূর্ণম্ ..