গণেশভুজংগম্

… গণেশভুজংগম্ ..

রণত্ক্ষুদ্রঘণ্টানিনাদাভিরামং
চলত্তাণ্ডবোদ্দণ্ডবত্পদ্মতালম্ .
লসত্তুন্দিলাঙ্গোপরিব্যালহারং
গণাধীশমীশানসূনুং তমীডে .. ১ ..

ধ্বনিধ্বংসবীণালযোল্লাসিবক্ত্রং
স্ফুরচ্ছুণ্ডদণ্ডোল্লসদ্বীজপূরম্ .
গলদ্দর্পসৌগন্ধ্যলোলালিমালং
গণাধীশমীশানসূনুং তমীডে .. ২ ..

প্রকাশজ্জপারক্তরন্তপ্রসূন-
প্রবালপ্রভাতারুণজ্যোতিরেকম্ .
প্রলম্বোদরং বক্রতুণ্ডৈকদন্তং
গণাধীশমীশানসূনুং তমীডে .. ৩ ..

বিচিত্রস্ফুরদ্রত্নমালাকিরীটং
কিরীটোল্লসচ্চন্দ্ররেখাবিভূষম্ .
বিভূষৈকভূশং ভবধ্বংসহেতুং
গণাধীশমীশানসূনুং তমীডে .. ৪ ..

উদঞ্চদ্ভুজাবল্লরীদৃশ্যমূলো-
চ্চলদ্ভ্রূলতাবিভ্রমভ্রাজদক্ষম্ .
মরুত্সুন্দরীচামরৈঃ সেব্যমানং
গণাধীশমীশানসূনুং তমীডে .. ৫ ..

স্ফুরন্নিষ্ঠুরালোলপিঙ্গাক্ষিতারং
কৃপাকোমলোদারলীলাবতারম্ .
কলাবিন্দুগং গীযতে যোগিবর্যৈ-
র্গণাধীশমীশানসূনুং তমীডে .. ৬ ..

যমেকাক্ষরং নির্মলং নির্বিকল্পং
গুণাতীতমানন্দমাকারশূন্যম্ .
পরং পরমোংকারমান্মাযগর্ভং .
বদন্তি প্রগল্ভং পুরাণং তমীডে .. ৭ ..

চিদানন্দসান্দ্রায শান্তায তুভ্যং
নমো বিশ্বকর্ত্রে চ হর্ত্রে চ তুভ্যম্ .
নমোঽনন্তলীলায কৈবল্যভাসে
নমো বিশ্ববীজ প্রসীদেশসূনো .. ৮ ..

ইমং সুস্তবং প্রাতরুত্থায ভক্ত্যা
পঠেদ্যস্তু মর্ত্যো লভেত্সর্বকামান্ .
গণেশপ্রসাদেন সিধ্যন্তি বাচো
গণেশে বিভৌ দুর্লভং কিং প্রসন্নে .. ৯ ..